| apple in day.. keep from doctor away | |
|
|
هذا قصه جميله من المبدع (( مغاط ))
من جد نبي ناس رايقه بالكتابه مثله
ياحبنيلك يا مغااااط
////////////
منول كان فيه أمير يدرس بالكلية اللي بجنب كليتنا !! و أذكر بذاك الترم بغيت انحرم بسبة السحب على المحاضرات .. لأني أطلع لكليتهم عشان أشوفه وأرجع .. و كنت إذا مريت عنده أحاول أعطس وأقول (الحمد لله) أشوف هو يرد وإلا لا !! وأذكر مرة كحيت بآخر قوتـّي .. إلا والله يوم التفت الأمير وناظرني وابتسم !! ياااالله يا ناس ما تتخيليون وشلون شعوري وقتها وكان هالكلام يوم الأثنين .. يوم جاء الليل عجزت أنام !! يا بعد الربوع بعداه !! ودي يجي بسرعة عشان أرجع للديرة وأعلم عيال الحارة إني صادقت أمير <<- عينك عينك !!
ماش ما قدرت أمسك نفسي و رحت لخالتي اللي كنت ساكنن عندهم وقلت لها تكفين خالة جيبي مفتاح التلفون من رجلتس .. عشان نفتح الصفر لأني لازم أدق على الديرة ضروري .. عاد رجل خالتي مابقى شي ماقفله ( ثلاجتهم و تلفزيونهم رابطه بسلسلة وشاري له قفل وآخذن المفتاح اللي يشوفه يقول بمقهى مهوب بـ بيت !! المهم راحت شوي و جت وأثرها جايبه ميدالية فيها مفتاحين كبار .. واحد حق التجوري وواحد حق التلفون !! قالت بسرعة تراي آخذته من تحت الفرشة وهو ما يدري !! فتحنا الصفر ودقيت على "الحمدي" و قلت له عندي لكم سالفة مع الأمير اللي اللي أنتم خابرين .. الله يعينكم بس !! تبي تنهبلون <<-- والله من زين الأسلوب !! قال الحمدي وش صار علمني !! قلت يا شينكم يالقراوى صدز ما عندكم صبر <<-- شف من يحتسي بس !!
وبعدين خلاص قلت لك الربوع يعني الربوع .. وخالتي تشرّ لي بيدها تقول يالله وهي واقفة عند الباب وتراقب لا يطب علينا رجلها لأنه لو درى إننا مكلمين (بالصفر) يبي يربط جدايلها بصدام سيارته ويبي ياخذ بها لفة على الحارة و يطلقها زي السلام عليكم !! أو إني انطرد و اطلع بشقة مع أخوان الحمدي الكبار !!
المهم يوم جاء الربوع ماش ما قدرت أكمل المحاضرة الأخيرة .. وأرفع يدي قلت للدكتور عن أذنك دورة المياه .. و الله وأمسك الخط .. وأنا على الطريق قاعد أتخيل أشكال عيال الحارة وهم غايرين مني إذا دروا إني شايف سنون أمير على الطبيعة !! يوم وصلت وأثرهم متجمعين !! وأقص لهم السالفة وأنا توني مابعد نزلت من السيارة .. وقلت لهم إنه قال لي " بسم الله عليك" يوم كحيت !! مار يطيح علينا الحمدي ونرشـّه بموية المسـّاحات .. وأشوى قام .. و كملت لهم السالفة قلت : وأخاف أقولكم سالفة مسجل موتري ما تصدقون ؟! يوم قاموا يحلفــّون لي ويقسمون إنهم يبي يصدقون !!
قلت لهم : إن مسجل الددسن بلع شريط طلال مداح .. و الشريط مهوب لي ولا أبيه ينقطع المهم رجعت لكلية الأمير وقلت يا شباب من معه مفك ؟! قال الأمير : مثلث وإلا مسطح ؟! قلت اللي يجي منك يا طويل العمر كله بركة ؟! قال تستهبل أنت ؟ المهم كان "جوهر" يمشي بجنب الأمير .. قال تبيني أمسح به البلاط طال عمرك !! قلت أنا : أقطع وأخس يا "جوهر" أنا أتكلم مع الأمير أنت وش دخلك أنت وراسك هاللي تسنه : " تسلوة بقرة " << يعني كليتها !! يوم طنقر علي .. أنت يا "جوهر" !! ما دريت إن ذا الأخويا متفلتين ويدوّرون الشر !! وأذكر إنه تلني مع غالوقة ثوبي .. وأشوى ثياب منول كانت ( أم طقطق ) وإلا كان تقطعت أزاريري .. !! <<<-- افلقني تساني قايلن هالمقطع لعيال الحارة !!
المهم قلت لهم إن الأمير .. خـّلا " جوهر الأسود " يجيب المفك <<-- وش ظنك يعني قد شفت جوهر حنطي !! ورحنا أنا والأمير للددسن و قمنا نحرحر بهالمسجل !! و أخذ الأمير مني المفك .. و كان عاض لسانه من الحماس لأن تعرفون الشريط اذا نشب بالمسجل يبي له تركيز .. والله شوي يوم طلع الأمير الشريط ورجمه على الطبلون .. وقال يالله سلام تبي شي ؟! وأخذ شماغ جوهر ومسح به العرق وراحوا !! يوم رفعت راسي أبحوّل من السيارة .. وأناظر العيال وأثر كلهم مغمى عليهم .. و رشيتهم موية وقاموا إلا الحمدي .. نقلوه للرياض وترقد بالشميسي اسبوع بغى يموت علينا !!
يا زين ذيك الأيام كانوا يجونــّي العيال من الديرة ونتواعد عن برج التلفزيون لأننا ما ندل إلا هو !! ويجون للجامعة : عشان أوريهم الأمير .. وأذكر مرة رحت للأمير قلت لاهنت معك منديل ؟! و عطاني منديلين وأنقهروا العيال .. عشاني ما قسمت لهم !! قلت لهم الناس مقامات !! روحوا لجوهر ولا هوب مقصرّ معكم !!
------------------------------------------------
@ مجموعة علك البريديه @ عالم جميل تصنعه البساطه
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
------------------------------------------------
* طريقة الاشتراك في القروب : ارسل رسالة فارغه على العنوان التالي
3lk-subscribe@yahoogroups.com
سوف تصلك رساله الرجاء اعادتها لكى يتم تأكيد الاشتراك
------------------------------------------------
طريقة الانسحاب من القروب : ارسل رسالة فارغه على العنوان التالي
3lk-unsubscribe@yahoogroups.com
سوف تصلك رساله الرجاء اعادتها لكى يتم انسحابك
------------------------------------------------
الارسال لجميع اعضاء مجموعة علك على البريد التالي
group3lk@gmail.com
Change settings via the Web (Yahoo! ID required)
Change settings via email: Switch delivery to Daily Digest | Switch format to Traditional
Visit Your Group | Yahoo! Groups Terms of Use | Unsubscribe
No comments:
Post a Comment