فرفشة: [3lk] روحتنا الى مصر

رحلتنا الى مصر

http://groups.yahoo.com/group/3lk

الرحلة حصلت فجئه بدون اي تخطيط مسبق حتى ربعي في الرحلة جايين صدفه وكان لكل واحد من اعضاء الرحله ميزه قويه لازم تذكر في بدايه الموضوع حتى تندمجو مع الموضوع

المتين ( خبره سابقه في مصر قبل سبع سنوات ) وعزيز الحسابه اذا حرك حاجبه الايمن بمقدار خمس درجات للاسف يطلع لك الكسور في الفواتير وعزيز ابو النوم هذا بنظام فيش مكيف ماشاء الله عليه خبرك فيه يسولف ولا تدري الا وهو في سابع نومه طبعا له اكتشافات قويه في الرحله نبي نوثقها باسمه لا تسرق ههههههههههههههه

حجزنا على موقع الخطوط السعوديه والاقلاع من بكره العصر ثم طلعنا لمكتب الخطوط السعوديه وقصينا التذاكر على الساعه عشر

ثم طلعنا ندور محلات ملابس في العليا طبعا الشباب ماسكه معهم يبون ماركات عالميه لكن للاسف مالقينا محلات فاتحها كلها مسكره الا محل ابوريالين لكن حاولنا بحل اكثر منطقيه ورحنا للهرم في شارع العليا

عزيز الحسابه حصل لبس حلو وخطير نبي نستعرضه خلال الرحله وعزيز الفيش كان عنده مشكله مع الالوان واتعبته كثير لكن في النهايه طلع بلبس خطير جدا اذهل جميع السياح اما بنسبه للمتين كان فيه مشكله مع الحزام كل الاحزمه الموجوده قصيره لكن بعد تفكير تقرر عمل ثقب اضافي في نهايه الحزام لحل الازمه وتم شراء الملابس وتجهزنا لرحله

من بكره على لساعه وحده الظهر خذنا لموزين وعلى المطار ونقلع بعد تاخر ساعه لان باب الطياره ما تسكر زين لان اكتوف عزيز الحسابه مسويه زحمه لكن كابت الطائره ماقصر سوا نداء لكل اللي موجودين في المطار وتجمعو ودفو الباب لين تسكر واقلعنا بسلام

بعد ماوصلنا المطار طلبو منا نعبي كروت تخص وزارة الصحه عن فلونزا الخنازير ثم مسكان سرا على الجوازت و هنا فيه حركه غبيه يسويها الموظف حق الجوازات اذا شافك خليجي وتامل في وجهك وحس انك دابه ونيسه قالك انتظر وروحك لغرفه ثانيه يقالك بيتاكدون من حاجه ولسالفه كلها يبون فلوس يعني شحاذه بسلوب مهذب <---- امحق تهذيب

طلعنا للمواقف وكان بنتظارنا السواق ابواحمد ونطلع معه ندور شقه ويتصل فيه خويه عادل قال عندي شقه انما ايه تقننن رحنا الشقه ونحصل شقه لها بابين باب على الشارع وباب على العماره

قلنا وش ذا الشقه يا اابواحمد قال هذي شقه اامنه قلت ليه وش السالفه قال يعني تسوي اي حاجه وانت في امان هههههههههه قلت في نفسيا افا وطلعنا دشير <--- على نياتهم حدهم الاهرامات

كانت الشقه فاشله بكل المقاييس لكن تنفع وكر لدشره قلنا لبواحمد مانبيها نبي شي راقي حنا يهمنا الراحه النفسيه قبل اي شي <--- ابوك يالكاش

وماقصر ابواحمد مسك بنا الدائري ويتصل على ام ندى قال عندك شقه قالت لا والله كل شي فل .. قلت لبواحمد وش ام ندى قال هذي عندها شقق نظيفه وفخمه وكل الخدمات اللي تحبونها موجوده

وبعد فتره صمت قال ابو احمد منوررر يا بيه ثم اتصل على ام سماح وسئلها عن شقق للايجار قالت عندي شقق

وتصف له مكان الشقه . قلت لبواحمد وش ام سماح قال كانت تشتغل عند ام ندى ثم طلعت تشتغل لوحدها واصبحت منافس قوي لام ندى .. ويوم وصلنا ونحصل ام سماح تحترينا في البلكونه . طلعنا لشقه واستقبتلنا ام سماح و شفنا الشقه جدا فخمه مو على شكلها الخارجي سيب فيه ثلاث غرف بشكل طولي كل غرفه لها حمامها الخاص وبانيو يتسع لشخصين بالراحه وصاله شرحه وتفتح النفس تنفع لاحياء الليالي الحمراء اذا خاطرك في رقص ودشره الشقه لاتفوتك اللي يبيها يكلمني <-- غطى على ام سماح

ام سماح حرمه كبيره في السن متحجبه وطباخه ماهره جدا على كلام السواق ابو احمد .. بس تشوفها تقول هذي ينتصلى على طرف ثوبها

بعد ماسئلنا عن سعر الشقه قالت ام سماح اصبرو يجي راعي الشقه . وتضبط لنا ام سماح احلا كاس شاهي ثم وصل راعي الشقه معه جوالين وسلسال على رقبته ويسولف معنا بسلوب تراي تاجر هههههههه ويقولو لنا عن الشقق اللي يملكها ومكتب تاجير سيارات وعقارات وفلل على النيل هذا غير صوره في الشقه مع شعبان عبدالرحيم

قلنا بكم الشقه قال بـ 1300 قلت واخر شي قال 1000 قلت طيب حنا نبي ناخذها يوم واحد وهو يزعل علينا قال معليش اقل من 3 ايام ما ااجرها

بعد كلام طويل قلنا له نبي نطلع الاسنكدريه كم يوم ونرجع ناخذها <--- فلم هندي طبعا

ونطلع من الشقه و نقول لسواق ابو احمد ودينا رمسيس هلتون صحيح الفندق غالي ويبي يخلصا قطتنا لكن شي نظيف وامن ومريح ونستاجر غرفه بسريرين مطله على نهر النيل

شكل الغرفه من الداخل بعد حوستنا

<--- اسمع واحد من بعيد يقول من اللي نام على السرير ومن اللي نام على الارض

طبعا نوم السرير غير صحي ومضر بفقرات الضهر ونوم الارض اكثر صحيه لكن عبدالعزيز الفيش ضرب بتقاليدنا عرض الحائط ينام على السريرين بطول حسيته يصفي حسابات قديمه مع السرير او يبي يحلل القطه هههههههه

كان عبدالعزيز الفيش قريبا جدا من تحقيق حلمه وهو الدخول الى قلب الهرم كانت امنيته ان تلامس يداه الحروف الفرعونيه المنقوشه على جدران الهرم .. كان يحدثنا وهو منسدح على السرير حتى غلبه النوم وسحب علينا <---- هذي عادته لا تدققون

نمنا الى الساعه 11 ثم كلمنا مكتب سياحي نعرفه وعطانا سعر الفندق بسعر اقل مع يوم مجاني <---- ناس فاهمه ولعبتها مصر <----- وخربس

ثم طلعنا نتغدى في الفرايديز على نهر النيل ويوم خلصنا متغدين ونطلب الفاتوره ويعطونا فاتوره غير فاتورتنا سعرها دبل لكن نباهت عبدالعزيز الحسابه كانت له بالمرصاد ومن بعد هذا الموقف البطولي اللي انقذ القطه من الهلاك قررنا تعيينه برتبة رئيس مجلس القطه وتم اسناد جميع الفواتير و الحسابات على عاتقه ههههههه ... ثم تقهوينا .. ثم حجزنا على السفينه الفرعونيه مع بوفيه متفوح لمدة ساعتين

طلعنا السفينه وكل واحد محجوزه طاولته و كانت السفينه مليانه عوائل خليجيه و فرنسيين وانقليز ومصاريه <---- يحاول يقرب الجو اكثر

كانت الرحله جدا جميله .. وكان فيها عروض حلوه ثم فقره للمغنيه ليلى بصراحه كانت مبدعه وحبيناها هههههههههههه وفي السفينه مصور اذا حاب تصور مع ليلى مايقصرون يجبونها عندك تصور طبعا كل حاجه بفلوس

بعد ما انتهت الرحله طلعنا الفندق وكان في الفندق جلسه حلوه في اللوبي وكان اول مستقبل لنا في اللوبي جنس ثالث مشخص في نص اللوبي ثم شوي ويجي خويه يعرج .. بغيت اسوي معاهم لقاء انزله بالقروب لكن طلعو بدري <---- واثق انهم بيعطونه وجه

ثم في اليوم الثالث طلعنا من الساعه وحده الظهر للاهرامات مع السواق قطب

اول ماوصلنا تجمعو علينا النصابين لكن السواق قطب كان لهم بالمرصاد اي واحد يجي قدامه يقوله اوعا ادوسك لكن احلى حركه من السواق قطب كنا داخلين جنب الهرم ويجي واحد يقول هات التذاكر قاله قطب فين بطائتك متوقعه واحد نصاب وهو بالفعل نصاب و يتهاوش هو وياه قال له قطب معاك يا ابني اللواء متقاعد ههههههه السواق قطب شايب وضابط عليه دور اللواء بصراحه صدقت ... ودخل عبدالعزيز الفيش وعبدالعزيز الحسابه الهرم وتحقق الهدف الاساسي من الرحله وماخلو جدار الا لمسوه <--- يسمعون برياضة الاثار

_ سؤال و جائزه _

صور عند الدخول داخل الهرم ومن داخل الهرم

ثم مرينا على القريه الفرعونيه بس مادخلناها حصلنها ماتسوى سعر تذاكرها ثم رجعنا للفندق وريحنا ثم طلعنا لسوق ستي ستار وشفنا افلام في السينما وتعشينا هناك ثم رجعنا الفندق وكملنا السهره في اللوبي

في اليوم الرابع طلعنا ملاهي دريم بارك الى المغرب

ثم طلعنا لمسرح الزعيم نشوف مسرحية البودي قارد طبعا ماشافه الا عبدالعزيز الفيش وحنا رحنا فرغلي نمزمز عصير ورحنا نشوف سنما افلام اجنبيه لان اغلب اللي في القاهره سنما عربيه

ثم رجعنا الفندق وكملنا السهره في اللوبي نشوف هزهزة باباي عاد اللوبي انواع الهبال الشباب مايصدقون يشوفون خليجيات الا وانواع التميلح ... حتى المصريات يلبسن عبايات وطرح حتى يجرون الشباب .. الله يهديهم متى يعقلون <--- طبعا حنا بس نتفرج والمقصد الاساسي من الرحله الاهرمات <--- صحيح ( عبدالعزيز الفيش ))

في اليوم الخامس كان موعد العوده وكان وقت الرحله الساعه وحده في الليل وقلنا نقعد في الفندق ونتغدى في مطعم الفندق ثم بعد ماجت الساعه 9 ونص طلعنا المطار مع سواق تكسي سواقته اي كلام مدري كيف وصلنا المطار

كان المطار زحمه واذا وصلنا عند نقاط تفتيش العفش بدا التميلح والشحاذه .. اول ماتجي في وجهه يقولك ليه زعلان .. اضحك ثم يقول مافيه حلاوه .. وقبل الاقلاع بساعه فتحو باب الطياره

و جنبنا في المقعد 3 سعوديين انواع المصاله كانو جالسين في مقعد مو مقعدهم ويوم قالو لهم قومو قالو ليه المقعد مقعد ابوه هههههه ياربيه انا ما اثور فيهم ولا تعال اسمع الازعاج و ضحكهم يسمعه اللي في الطياره الثانيه

ثم شوي واسمع واحد وراي قاعد يلعب له بزر وانواع الاسئله وانواع التميلح يقالك يلعبه وهو يروعه وبعد ما انتصفنا في الرحله طلع البرز معه اخواته وقاعد ابوالشباب يتميلح طول الرحله مسوي فيها حنون ومزعجنا بغيت افك جناح الطياره واصمخة <-- فكوني عليه

ملاحظاتي بعد الرحله :

بعض السعوديات في مصر تحصلها كاشفه وبس تشوفك تغطى والمشكله انها عجوز لو تحطها في كاتم مااستوت من كبرها هذا غير الصفوط اللي في وجهها مادري وش سر الحركات الغبيه هذي .. يعني وش فرق مصري عن سعودي .. يعني بياكلك !!!

اذا الانسانه محترمه وفي حالها مستحيل احد يتعرضها ولو كان فيه احد متحرش فيها فهو بسبة تصرفاتها .. وانا مع الحجاب استر لها بس سالفه تكشف عند ناس وتغطى عن ناس جايبه لي حموضه

بعض السعوديين يجد من الفخر انه يكون ضد النظام يعني ماعندي في احد !! ... ولا تحصله مسوي ازعاج في المكان وانواع الحركات الغير متوقعه ... وان دل فهو يدل على نقص فيه .. ويحاول يغطي نقصه بحركاته المصاله

بعض المصريين والغالبيه منهم .... يشوف اي خليجي حصالة دراهم يعني مستحيل تحتك في احد منهم الا دابل عليك السعر ... هذا غير ازياده في اسعار التكاسي او الشراء من المحلات

تدخل السنما تحصل مقاعد مكانها حلو مسوينها محجوزه وهي فاضيه بس تدخل السنما يقولك ليه اخترت المكان هذا تعال ازبطك ثم يقول هات الحلاوه .. ولا اذا شاف بنت خليجيه قال تعالي في المكان هذا وما اخلي احد يجلس جنبكم ثم هاتي الحلاوه

ولا قالك كل عام وانتم بخير .. حاقه حلوه يابيه .... هذا غير حركات التاكسي الفاشله تقول اسم مكان ثم يسوي نفسه فاهم غلط ويوديك لمكان ثانيه عشان تعطيه اجره اضافيه ... لو دخلت مكان تغسل يديك فيه تحصل واحد واقف لك بالمنديل ولا يعطيك صابون

ثم يقولك حاقه حلوه يابيه .. عبدالعزيز الفيش مايعطيي احد شي يقول مابي اعودهم <---- ماشاء الله عليه بياثر عليهم هههههههههههههههههههه

انتهى ملخص رحلتنا الى مصر

محدثكم

AMMAR

__._,_.___

Messages in this topic (1) Reply (via web post) | Start a new topic

Messages

------------------------------------------------
------------------------------------------------

@ مجموعة علك البريديه @ عالم جميل تصنعه البساطه

http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk

------------------------------------------------

* طريقة الاشتراك في القروب : ارسل رسالة فارغه على العنوان التالي
3lk-subscribe@yahoogroups.com
سوف تصلك رساله الرجاء اعادتها لكى يتم تأكيد الاشتراك

------------------------------------------------

طريقة الانسحاب من القروب : ارسل رسالة فارغه على العنوان التالي
3lk-unsubscribe@yahoogroups.com
سوف تصلك رساله الرجاء اعادتها لكى يتم انسحابك

------------------------------------------------
الارسال لجميع اعضاء مجموعة علك على البريد التالي
group3lk@gmail.com

MARKETPLACE

Mom Power: Discover the community of moms doing more for their families, for the world and for each other