السلام عليكم ورحمة الله وبركاته
صباحكم / مساءكم معطر بريح الإجازات اللي ماتطوّل ..
يعنبوها من إجازة ماتسوى ع الواحد يطلع أو يهجّ إلا وهي قاضيه ..
لو أنهم خلونا نكمل ونخلص مبكرين أزين .. حتىا حجوزات مالقينا .. يقول لي واحد فالخطوط ليش ماحجزت قبل شهر من الإجازه .. يعنبوك وش يدريني أني بشتهي أروح الشرقيه ولا مكه وقتها .. يمكن أنشغل ولا أهوّن ..
مير سحقاً لتس يالخطوط السعوديه ..
علىا طاري الشرقيه .. هذي صورة خذتها قبل شهر على كورنيش الخبر .. الموهم طبقت عليها أحد الدروس اللي خذتها من أستاذي وقدوتي في التصوير صاحب الكاميرا البهيه والنظره العصيه والبسمه الشقيه : سلطان السلطان ..
عقب مالعبت فيها وحسّيت أني أقوى شي فالعالم قلت بوريكمياها .. لعل وعسى أن تحوز على رضاكم وتنال ذائقتكم وتحسّون بالإحساس اللي خلاني أطلق من سلطان نفسه <~لايكثر خلاص درينا أنك تعرف تصور خخخ
.
إنتقاداتكم تهمني .. :$
//
على طاري الإنتقاد .. الموضوع اللي راح جلست أحتسي عن ذاك العسكري اللي مسك أخوي عند التفتيش .. وحاسبوه عن أربع مخالفات .. ثلاث منهم كذب وإفتراء ..
طيب شوفوا هالقفطه, رجل مرور يقطع الإشارة قدام كل أبو العالم وواضحه من الصورهـ كل التفاصيل :
هذا من يحاسبه؟!!
ولا حتى ولع السفتي !!
يقولون أني أصلح أشتغل فالمرور السرّي خخخخ
//
على طاري المرور وحفظ الحقوق ..
واحد يسأل خويه: أنا رحت مع العالم وشريت لي مكينة سنقر بـ 100 ألف من واحد يقول لي فيها زئبق أحمر وعلى الشرط بعد ..
وحط لي جواله أبو بصمه وراحت الأبراج كل أبوها ..
وأكتشفت ألحين أنه أنلعب علي .. وش السواة ..؟!
قال له: تبي حقوقك؟!
قال: إيه ..
رد عليه: تعال دوّر !!
/
زي العادهـ .. المقدمة تاخذ نص الموضوع .. ويمكن أحياناً أكثر
أحس يبي لي آخذ دورات فالمقدمات مدري ليش .. المهم لاتضيعون وقت فالحتسي اللي فوق .. أنزلوا للفقرات ..!
/
ملاحظة كبر قريح:
((لا تقرون الموضوع وأنتم فاضين .. لكن فضوا أعماركم عشان تقرونه))
<~ كيف بس ؟! 
بسم الله نبدأ :$
][ مدخل ][
لا هوى قبلك..!
ولا أمل بعدك..!
لا سما إلا عيونك..
ولا ثرى في وعدك..
انتي كل الناس وحدك ..!!
][ بايعتها ][
نزل أحد أئمة المساجد لـ أحد الصرافات وسحب مبلغ 5000 ريال من حسابه,
وبيتبرع فيها لأحد المرضى المنومين في المستشفى,
لكنه يوم أنه رجع لسيارتهِ لقى فيها حرمه ..
المهم أنه رجع يتأكد من اللوحه ولقاها نفس سيارتهـ
الموهم أنه راح مع الشباك وقال لها أنزلي يابنت الناس تراتس غلطانتـ(ن) فالموتر..
نزلت الحرمه , همّن يوم ركب هو وترجع تركب هي مرتـ(ن) ثانيه معه ..
قالت له هات المبلغ اللي معك , وهو عاد حاول يذكرها بالله عز وجل وأن هالشي حرام,
همّن قالت له "أنا بايعتها وعلى بال ما تطلع من القضية تكون تمرمطت"
وحاول يعطيها 2000 ريال بس هي أصرّت على 10000 , عاد عطاها الـ 5000 اللي معه ,
وعطته هي 100 ريال على حدّ قولها " حق البنزين"
ونزلت من السيارهـ وقطعت الشارع وهو مبلّمـ(ن) خشته ومهوب مصدق اللي صار ..
عاد يقول : الحمدلله انها انتهت على كذا , خلوها تاخذ الـ 5000 مقابل هالفضيحه .!!
/
/
نجي للنقاش ألحين :
سـ/ شرايكـ يا آدم بتصرف هالآدمي, هل هو صح ولا غلط؟؟
سـ/ هل يا حواء تتوقعين فيه بنات قلوبهم هيك؟؟ ويسوون مثل هالشي؟؟
سـ/ لو أنت يا آدم مكانه بتسوي مثله ولا وش بتسوي؟؟
سـ/ من أول كنا نسمع أن بعض الرجال (بغض النظر عن الجنسيه) يسوّون هالسوايا, ووصلت ألحين لبعض النساء , (بغض النظر عن جنسياتهم أيضاً) .. سـ/ وش الأسباب اللي تتوقعون أنها خلت هالحرمه "تبيعها" حسب كلامها .. بما فيها سمعتها وعِرضها, وتسوي هالسوايا؟؟
][ فائدة الخدود ][
عزيزي آدم ..
إذا عايركـ صديقك وقال لك يا أبو راس
أو قال لك يا أبو كرشه
أو حتى قال لك يالتكروني
فـ لا تزعل ولايضيق صدرك
/
عزيزتي حوآء ..
إذا قالت لتس صديقتس يا أم كشه
أو لو قالت لتس يا أم ضروس
أو حتى لو قالت لتس يا أم ريحه
فـ لاتزعلين ولايضيق صدرتس
/
يمكن تكون بعض العيوب مميزات ..
بس ناظروا المرايه .. وتحمدوا ربكم .. وإستخرجوا الفوائد العشره لعيوبكم , مع الأخطاء العشرهـ فـ خششكم ..!
/
أحد النماذج لبعض البزارين اللي عيارتهم "أبوخدود" :
][ قدام المدخل ممنوع , في الخلف بـ قريح ][
سألني مرتن من المرارير أحد الأشخاص: متى بنتطور؟
قلت له: يمكن إذا مارمينا أوساخنا في الشوارع..!
××
في أحد المرات المريرة التي مريت فيها مرور الكرام مع مرور الزمن بمرور فترة المساء القصيرهـ 
مريت بأحد العماير في مدينة الرياض العاصمة , وشفت هالمشهد ..!
يحق لأي شخص أن يكون مدخل منزله نظيف, لأن نظافة المدخل جزء مهم لمظهر صاحب المنزل..
وهالمسكين حط هاللوحة عشان يتخلص من (بعض التصرفات الخاطئة لسكان العمارة) من رمي القمامه قدام المدخل ..
صاروا المساكين يخافون منه , أو عشان ننصفهم نقول (يحترمونه شوي
بس صاروا يرمون مخلفاتهم خلف مدخل العمارة ..
صارت القاعدة هنا (قدام المدخل ممنوع , في الخلف بـ قريح) ..!
أنا لو أني ساكن هنا أتوقع بسوّي قطة لأهل العمارة ونشتري بها سطل زبالة ..
وما أستبعد يجي واحد يرمي مخلفاته جنب الزبالة ..!
صورة بسيطة أو نقول عابرهـ , بس تتكرر في مناطق كثيرة في ديرتنا للأسف الشديد ..
السؤال هنا :
مع مرور الشمس في الصيف والشتاء وتقهقر الوقت في الصبح والمساء وحومة التسبد في الغداء والعشاء ..
متى بنتطوّر.؟!
هل هو تقصير في توفير أماكن القمامة / أو نقص الثقافة وعدم النظافة..؟
في سطر وربع .. كل واحد يسأل نفسه ويعطينا رأيه .؟!
.
][ فاصل ][
من ملك ضحكة عيونك..
وابتسام الفجر فيها..
ما بقى في الدنيا ناس..
ولا بقى أرضٍ يبيها..
إنتي يا عمري الليالي..
كلها قربك وبعدك..
وإنتي كل الناس وحدك ..!!
لا هوى قبلك..!
ولا أمل بعدك..!
][ طـ ق ـاق × طـ ق ـاق ][
.
][ قطاوهـ × قطاوهـ ][
الفرق بين القطو اللبناني والقطو السعودي :
القطو اللبناني:
ينعن بليسها لوها آدمية صدز خطبتها 
القطو السعودي:
وذا لوهـ آدمي وخلصوا الرجاجيل مازوجته بنتي ..!
][ مخرج ][
أنا أحبك والله شاهد..
روحي من غيرك تضيع..
وإن حكى في حبي واحد..
أتركي إنتي الجميع..
إظلمي قلبي بدلالك..
وإنصفي منهو يردك..
إنتي كل الناس وحدك ..!!
لا هوى قبلك..!
ولا أمل بعدك..!
كلمات:
بدر بن عبدالمحسن
البدر
في آلختآم .. أشكركم على متابعة الموضوع للأخير ...
وأتمنىآ آن يحوز على رضآكم وينآل ذآئقتكم كل آبوٍكم ..
واللي يبغى يردّ لو على فقرهـ وحدهـ عجبته يجوز ترى .. أوب لازم أحد يفصفص أم الموضوع ..
اللهم إغفر لي ولكم .. ولوالديّ ووالديكم وأجدادي وأجدادكم وجميع المسلمين والمسلمات الأحياء منهم والأموات (F) 
سبحانك اللهم وبحمدك , أشهد ألا إله إلا أنت , أستغفرك وأتوب إليك
اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ
.
الإستماع للقرآن الكريم
http://www.tvquran.
.
كتبه وأملاهـ / باء نقطه شين
بدر.الشوق
وفي روآية / أبو س ـعد
سلآمـ
منتدى فهاوه
http://www.fha5.
عالم من الفضاوهـ
تم تركيب الستايل الجديد
/
للتواصل:
b.s9@hotmail.
.
------------------------------------------------
@ مجموعة علك البريديه @ عالم جميل تصنعه البساطه
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
http://groups.yahoo.com/group/3lk
------------------------------------------------
* طريقة الاشتراك في القروب : ارسل رسالة فارغه على العنوان التالي
3lk-subscribe@yahoogroups.com
سوف تصلك رساله الرجاء اعادتها لكى يتم تأكيد الاشتراك
------------------------------------------------
طريقة الانسحاب من القروب : ارسل رسالة فارغه على العنوان التالي
3lk-unsubscribe@yahoogroups.com
سوف تصلك رساله الرجاء اعادتها لكى يتم انسحابك
------------------------------------------------
الارسال لجميع اعضاء مجموعة علك على البريد التالي
group3lk@gmail.com
Change settings via the Web (Yahoo! ID required)
Change settings via email: Switch delivery to Daily Digest | Switch format to Traditional
Visit Your Group | Yahoo! Groups Terms of Use | Unsubscribe
No comments:
Post a Comment